3.8.10

Porto do Son: e despois de varios anos, o muro da Arnela, un pouco menos feo

O deste muro ten pouco amaño (e se o ten, cunha cuberta xeitosa, ou, se alguén fose moderno no goberno deste concello, cuns grafittis feitos por profesionais sobre os numerosos atractivos turísticos do concello, non sería barato). Pero polo menos, logo de polo menos tres anos, está menos feo...

Posted via email from Certo.gl, o xornal dixital de Barbanza e Noia

Rianxo: o terceiro concerto do VI Ciclo de Bandas "Concello de Rianxo" conta coa Banda Artística de Merza

Rianxo, 3 de agosto de 2010. A Xunta Directiva da Escola de Música de Rianxo ten o pracer de convidar, a todo o público que desexe asistir, ao VI Ciclo de Bandas "Concello de Rianxo". Nesta ocasión haberá oportunidade de presenciar o concerto que a Banda Artística de Merza ofrecerá o domingo 8 de agosto ás nove da noite no Auditorio.


Posted via email from Certo.gl, o xornal dixital de Barbanza e Noia

A Pobra do Caramiñal: o Psoe replica ao alcalde sobre o POL que "terxiversa a realidade"



A Pobra do Caramiñal, 3 de agosto de 2010
.- Logo das declaracións que o alcalde de A Pobra, o popular Isaac Maceiras, fixo onte sobre o Plan de Ordenación do Litoral, nas que acusaba á oposición de enganar aos veciños e lles esixía pedir disculpas, a reacción dos socialistas non se fixo agardar. Transcribímoslles íntegra a súa nota de prensa:

"Temos que recordarlle ó equipo de goberno, liderado polo Sr. Isaac Maceiras, que xamais enganamos aos veciños, que lle expuxemos a realidade da documentación que a Xunta do Sr. Feijoo enviara ó Concello, e que debido a nosa presenza nos medios de comunicación, os obrigamos a xestionar minimamente os intereses dos veciños.

Non se esqueza ese equipo de goberno que o Partido Socialista da Pobra, antes que ninguén, lle solicitou unha reunión con técnicos e con todos os grupos políticos da Corporación para analizar e clarificar os niveis e áreas de afección. Non se atendeu a nosa solicitude, nin se nos dou resposta algunha, cando nós pensabamos que unha resposta unánime de toda a Corporación era a mellor defensa.

A continuación, o Sr. Isaac trouxo ó redactor do PXOM para que sen coñecernos de nada nos puidera insultar publicamente. Naquel entón xa habíamos contratado un estudio de arquitectura que nos asesoraba permanentemente. Xamais mentimos, nin contaminamos nada, pero conseguimos que debido a intranquilidade dos veciños, o PP da Pobra se movera un pouco.

Posteriormente fixeron unha pequena alegación na que en dúas follas se dedican a poñer recortes de prensa e incluso a nosa revista informativa “forte e claro”. Chócanos que aparece un recorte de prensa do día 20 de abril pero non aparece o recorte do día 21 que textualmente dicía: “EL PSOE PIDE QUE EL PXOM DE A POBRA PREVALEZCA SOBRE EL PLAN DO LITORAL”, xa que fomos os socialistas a través dos deputados autonómicos Mar Barcón e Lage Tuñas os que tomamos a iniciativa nese sentido e a vez lle dou a idea a este equipo de goberno esgotado.

Por certo que a alegación ao POL do goberno da Pobra é de maio de 2010, carece de rexistro de entrada é de día de presentación. Tanto se debandaron os miolos que o SOLICITA desa alegación non é máis que o titular de prensa cas demandas dos socialistas en abril. Se reduce (textual): “ Que el Plan de Ordenación del Litoral incorpore las propuestas del Plan General de Ordenación Municipal de A Pobra do Caramiñal”.

Este goberno municipal nada fixo polos veciños foi a remolque e copiando as boas iniciativas dos socialistas. Si o aportado foi para que non nos afectara o POL, benvido sexa, aínda que para ser inofensivo o POL levoulle os técnicos meses resolver as afeccións que si había.

Mencionan o noso voto en contra ao PXOM, é certo, e tampouco nos arrepentimos de nada. Según eles con ese gran Plan Xeral, feito a súa medida, iamos a crecer, a aumentar a poboación e o que se está demostrando é que co Sr. Isaac vamos a desaparecer como Concello, cada día se instala menos xente no noso pobo, esa xestión lévanos a ser case un pobo fantasma durante 10 meses, onde este goberno tivo moito interese en que se  construíran segundas vivendas para xente foránea.

A carencia de ideas a falta de motivación deste goberno, o esgotamento, estanos levando a deriva, sen rumbo. O cumio do despropósito é que se atreva a pedir a nosa dimisión a persoa máis irrespectuosa, a que máis insulta, na boca desta persoa esas palabras o descalifican automaticamente, carece de valor todo o que este Sr. diga.

O concello non é o “cortijo” de ningún político local, e na Pobra este goberno do PP o único que fai é “da capa un saio” como di o refraneiro. Dedíquense a buscar o beneficio común que para iso cobran. O PSOE da Pobra ten o rumbo ben marcado".

Posted via email from Certo.gl, o xornal dixital de Barbanza e Noia

Porto do Son: os comuneiros de San Pedro de Muro organizan unha consulta popular acerca do abandonado campo de fútbol

"Hoxe atopámonos cunhas instalacións totalmente abandonas; cascallos amoreados, lixo por tódolos recunchos e un campo ateigado de xestas e pinos. Qué nos pasou para esquecernos deste espazo que integrabamos na nosa vida cotiá como punto de encontro; un espazo de referencia deportiva; un espazo de desfrute ao aire libre; un espazo do que estar orgullosos e orgullosas.

Sen menosprezar o esforzo e traballo daquelas persoas que contribuíron dalgunha maneira a que este campo de fútbol vivise uns anos dourados, hoxe queremos facer unha consulta popular para saber qué podemos facer con este espazo xa que, os tempos cambian e quizais hoxe as necesidades sexan outras.

Na última asemblea da comunidade de montes, acordouse colocar unha urna na casa de cultura de San Pedro de Muro para que, de xeito totalmente anónimo, calquera persoa poida deixar a súa proposta acerca do futuro do campo de fútbol. De entre todas as propostas estudarase a viabilidade das tres máis repetidas".

Aínda que non sexades de San Pedro de Muro: tedes algunha boa idea para que este espazo sexa recobrado para a vida cotiá dos veciños? Pois contádella en http://sanpedro.blogaliza.org
Cantas máis cabezas matinen, seguro que mellores propostas sairán!
Nós non sabemos se xa o teñen, pero ao mellor un viveiro con sementes autóctonas para repoboar podería ser interesante... Iso como idea sensata. Como idea tola, e xa que era un campo de xogo, convertilo no primeiro campo oficial de lanzamento de sacho da comarca... Ou nunha pista polideportiva só para xogos tradicionais (billarda, bolos, rá, petanca...)
Veña, que non decaia!

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical