3.5.12

Política: piden que a Xunta deixe de gastar 15 millóns de euros en alugueres superfluos

  • Segundo o Psoe, hai "centos" de inmobles públicos sen uso namentres se gastan 9,2 millóns de euros en alugueres en Galicia
  • Lage Tuñas pide o peche de embaixadas concertadas coa Confederación de Empresarios de Galicia, ás que tacha de "auténtico despilfarro" -4,5 millóns de euros ao ano-

 

Santiago, 3 de maio de 2012. 

O portavoz da Área institucional do Grupo Socialista, José Manuel Lage, presentou hoxe, en rolda de prensa, unha Proposición non Lei mediante a que se insta á Xunta a realizar, antes do 31 de xullo, “un chequeo xeral dos inmobles en propiedade que dispón o Goberno galego e os entes autonómicos para que sexa remitido ao Parlamento dando conta da relación, situación e o uso actual dos devanditos inmobles.”

A iniciativa de Lage Tuñas esixe tamén revisar os contratos de aluguer de locais  que ten a Xunta asinados e que están destinados a situar departamentos e servizos da Administración autonómica, priorizando a reubicación de servizos en inmobles propiedade do Goberno autonómico ou doutras administracións públicas.

A Proposición non de Lei socialista insta tamén a abordar o peche das novas embaixadas da Xunta no exterior e buscar novas solucións para manter a presenza galega no exterior a partires da colaboración co Ministerio de Asuntos exteriores de España.

O deputado socialista xustifica a súa iniciativa no coñecemento de que a Xunta, en 2011 dispoñía unha contía superior aos 9,2 millóns de euros para sufragar os gastos derivados do aluguer de oficinas e inmobles dedicados a situar diferentes servizos da Administración autonómica. Este gasto elévase ata os 10 millóns de euros se lle engadimos os contratos derivados do que se coñece como “administración paralela”.

A maiores, engade o deputado socialista, o goberno de Feijóo gasta 6,4 millóns de euros nas súas oficinas no exterior, sen ter adoptado ningún acordo para o seu peche, a pesares dos criterios anunciados polo Goberno do Estado de reubicar estas “embaixadas” autonómicas para evitar gastos aos gobernos autonómicos.

Entre os inmobles alugados dentro da Comunidade Autónoma, salienta Lage Tuñas, que se están a pagar cantidades que non se corresponden coa realidade económica actual do país. Citou, como exemplo, os máis 4.100 €/mes de Galicia Calidade, ou os máis de 15.000€/mes de Portos de Galicia, ou o Instituto Galego de Consumo, que gasta máis de 14.000€/mes.

As embaixadas de Feijóo no exterior

O parlamentario socialista desglosou os case seis millóns e medio de euros en presenza exterior dividindo dous millóns en inmobles institucionais, dos que o Palacete da Casa de Galicia en Madrid supera os 700.000 euros de gasto, e os outro 4,5 millóns de euros corresponden ao acordo que a Xunta ten coa Confederación de Empresarios de Galicia, para ter “embaixadas abertas”.

O país non se pode permitir redes de embaixadas gastando 4.000 €/mes en Xapón, outra sede do IGAPE en Polonia, que costa máis de 3.200€/mes da que non sabemos as xestións ou o que se fixo alí, ou unha oficina en Miami cun custe de 11.000 €/mes”. Tres espazos económicos diferentes, postos de exemplo polo deputado socialista, onde “a Xunta gasta cartos públicos todos os meses” sen que saibamos “o proveito para Galicia”.

Asistimos a unha serie de decisións "graves” que afectan aos servizos públicos, que se deterioran por mor dunha política de recortes que, desde logo, insiste Lage, “esqueceu facer un chequeo xeral do Patrimonio da Administración Autonómica”. “Óptase por recortar aos empregados públicos e alí onde máis se  precisa, a Sanidade e a Educación, nos Servizos Sociais”, pero o Goberno Galego segue mantendo determinadas políticas que Galicia “non se pode permitir”, a xuízo dos socialistas.

Non é posible que sigamos mantendo centos de locais en aluguer pagando contías que en algún caso son moi onerosas”, entende Lage que “hai que facer unha revisión”. Para o deputado “cando hai que apertarse o cinto, non se lle pode pedir sempre o esforzo aos mesmos”. Son 15 millóns de euros en alugueres, das sedes dentro da Comunidade, como na rede exterior. Lage esixe un “cambio de rumbo” na política de patrimonio para “evitar o gasto improdutivo e se mellore a eficiencia económica dentro da Administración galega”.    





Lage

120503 001 by My Recording Listen on Posterous

81890-PNP Inmobles que son propiedade da administración pública galega.pdf Download this file

Posted via email from Certo.gl, o xornal dixital de Barbanza e Noia

Cultura: Serafín Marcos presenta o seu novo espectáculo "Coñeces a Valentín?", sobre o homenaxeado nas Letras Galegas

Coñeces a Valentín -.pdf Download this file

Datas de representación na primeira quincena de maio:

Venres 4: IES Sofía Casanova en Ferrol ás 10,30 e 11,30 h.

Martes 8: IES Leiliadoura de Ribeira, pola mañán en horario sen determinar, Concerto Didáctico "Música e Circunstancias": Lucía Bustabad (piano), Dalibor Sebestík (violoncello) e Serafín Marcos (guitarra)
Mércores 9: IES Poeta Añón de Serra de Outes ás 10,30
Venres 11: Auditorio de Ribeira ás 11 horas

                            
    

Posted via email from Certo.gl, o xornal dixital de Barbanza e Noia

Ribeira: este sábado comeza o Circuito de Carreiras Populares, coa proba do Corgo

  • Anotáronse 177 deportistas na proba deste sábado pola tarde
  • A seguinte será o Día das Letras Galegas (a da Guía), a do Demo (6.666 metros o 26 de agosto) e a de Santa Uxía (16 de setembro)
  • O concelleiro de Deportes presentou este circuito, que xa vai pola quinta edición, xunto co presidente da Cofradía da Dorna, Jacob Moraña, e o directivo da mesma, Eduardo Iglesias

Ribeira, 3 de maio de 2012.- Hoxe tivo lugar a presentación da quinta edición do Circuíto de Carreiras Populares Concello de Ribeira, que dará comezo este sábado día 5 de maio coa primeira das catro probas que integran o calendario: a carreira de campo a través do Corgo, caracterizada polas súas espectaculares vistas, grazas a que aínda a ningún político se lle ocorreu asfaltar, formigonar ou encher con piscifactorías este litoral.

Para explicar tanto as características desta primeira competición como para anunciar as datas das outras tres, déronse cita no Consistorio o concelleiro de Deportes, Juan Luis Martínez, e dous representantes da Cofradía da Dorna: o seu presidente Jacob Moraña e Eduardo Iglesias.

Juan Luis Martínez agradeceu a colaboración recibida por parte das distintas entidades que promoven cada unha das citas: O Corgo (organizada pola Cofradía da Dorna), a carreira da Guía (que terá lugar o 17 de maio e está organizada pola Asociación de Veciños de Carreira); a carreira do Demo (prevista para o 26 de agosto baixo a organización do Centro Recreativo de Artes) e Santa Uxía (celebrarase o 16 de setembro e está organizada polo Concello coa colaboración da asociación As Miñoteiras).

O edil e tenente de alcalde tamén destacou a colaboración doutros entes locais privados e de servizos públicos como Protección Civil, Policía Local, a brigada municipal de limpeza ou a concellería de Benestar Comunitario.

O Corgo: só 26 mulleres de 177 inscritos

En canto á carreira do Corgo, xa está rematado o prazo de inscrición e serán 177 o número de persoas que participen. Delas, 26 son mulleres e 14 van competir na modalidade mixta por parellas. Non se establecerán clasificacións por categorías en función da idade.

A carreira sairá ás 17.30 horas do lugar de Teira, na parroquia de Corrubedo,. Está prevista unha duración de sesenta minutos. A retirada de dorsais poderase facer dende unha hora antes. Serán un total de 9,3 quilómetros de percorrido que, segundo explicou Eduardo Iglesias, está modificado nun 33% con respecto non só ao do ano pasado senón aos de todas as anteriores convocatorias.

Media_httpfarm4static_xjfkp

Descorrerá por puntos como os campos de Teira, a praia e o lugar de Espiñeirido e o monte Facho. Haberá un avituallamento intermedio no quilómetro 6 e outro ao final da carreira. Habilitaranse duchas no polideportivo de Sirves para os corredores.

Segundo manifestou Jacob Moraña, con esta iniciativa búscase seguir recuperando os camiños dunha paraxe idílica como é a formada polos campos de Teira, O Corgo e Espiñeirido.






 

Posted via email from Certo.gl, o xornal dixital de Barbanza e Noia

Ribeira: o pleno rexeita o último "Gallardonazo" e pide que non se cambien as actuais demarcacións xudiciais

  • De levarse a efecto o proposto polo ministro de Xustiza conservador, o partido xudicial de Ribeira desaparecería, xunto cos de Noia e Muros, pasando a Corcubión

Ribeira, 3 de maio de 2012. Non contento con querer facernos repagar a xustiza, o actual ministro de Xustiza, o popular Alberto Ruiz Gallardón, quere desfacer -disque con criterios de eficiencia, manida escusa deste novo goberno para aplicar recortes a todo o que lle parece- os actuais partidos xudiciais. A súa proposta é refundilos noutros máis amplos. Iso, para provincias ou territorios como Madrid -comunidade autónoma na que gobernou ese mesmo ministro, deixando unha débeda de máis de 15.000 millóns de euros, a terceira máis alta de España, só superada por Cataluña e Valencia- sería factible, pero nunha zona como Galicia, onde a dispersión é unha "marca" do territorio, é unha auténtica tolemia e faría que os cidadáns viran aínda máis complicado acceder ao dereito fundamental da tutela xudicial efectiva, recollido na Constitución.

En Ribeira goberna o PP con maioría absoluta, pero ao equipo de goberno dirixido por Ruiz Rivas non lle doen prendas para defender aos veciños e, conxuntamente cos outros partidos, acordaron pronunciarse contra esta nova desfeita que pretende levar a cabo un ministro de Mariano Rajoy.

Declaración institucional lida onte no pleno:

Tendo coñecemento este Concello da proposta que o Consello Xeral do Poder Xudicial pretende debater en data de 3 de maio de 2.012 en aras a establecer una nova demarcación xudicial desaparecendo os partidos xudiciais de Noia, Muros, Corcubión e Riveira e crear un partido xudicial único integrado polos catro, e cunha sede única, sendo a ubicación proposta Corcubión,

Considerando que para o partido xudicial de Ribeira, o cal aglutina a meirande parte do partido xudicial, cunha poboación de case sesenta mil habitantes (Ribeira, Pobra e Boiro), e coa maior carga de traballo de todos eles, suporía uns gravísimos prexuízos non so por perder a ubicación física do xulgado senón tamén por ter que desprazarse a outra localidade coa que existen unhas deficientes comunicacións por estrada.

Por todo o anteriormente dito, os Grupos Municipais que compoñen a Corporación Municipal de Ribeira acordan:

Primeiro.- Que o Concello de Ribeira rexeite a nova demarcación xudicial a debater polo Consello Xeral do Poder Xudicial en data de 3 de maio de 2012, desaparecendo os partidos xudiciais de Noia, Muros, Corcubión e Ribeira e crear un partido xudicial único integrado polos catro, e cunha sede única, sendo a ubicación proposta Corcubión.

Segundo.- Solicitar do Ministerio de Xustiza que manteña a actual configuración do partido xudicial de Ribeira.

Terceiro.- Que pola Secretaría do Concello se emita certificado do presente acordo aos efectos da súa remisión ao organismo correspondente.




Posted via email from Certo.gl, o xornal dixital de Barbanza e Noia

Ribeira: Eli Ríos imparte un obradoiro este sábado para que os nenos coñezan o oficio de escribir

  • Para nenas e nenos de 3 a 6 anos, baixo o epígrafe "Que é iso de ser escritor?"


O ano pasado impartira un obradoiro similar Santiago Jaureguizar, escritor vasco-galego

 


Ribeira, 3 de maio de 2012.- A Biblioteca Municipal acubillará este sábado 5 de maio unha nova iniciativa cultural consistente no desenvolvemento dun obradoiro dirixido especialmente a nenos e nenas con idades comprendidas entre os tres e os seis anos, aínda que tamén recomendable para rapaces de ata dez anos. O seu título, “Que é iso de ser escritor?”.

 

Media_httpwwwaelgorgr_pgjkt

Eli Ríos, en ficha da AELG


A persoa encargada de impartir o obradoiro vai ser a poetisa galega Eli Ríos (Londres, 1976), quen traballará cos pequenos co obxecto de achegalos ao mundo da literatura e ao oficio de escritor.

 

A actividade terá lugar de 11.30 a 12.30 horas e é de balde. Os nenos poderán ir acompañados dos seus pais ou familiares, se ben a presenza destes durante o transcurso do obradoiro non é necesaria dado que haberá persoal que se faga cargo do coidado dos rapaces.

 

Organiza o Concello de Ribeira a través da súas áreas de Educación e Cultura e do Servizo de Normalización Lingüística, coa colaboración da Xunta de Galicia.








 

Posted via email from Certo.gl, o xornal dixital de Barbanza e Noia

Noia: este venres 4 de maio, charla-homenaxe a Rosalía na casa de cultura


Panteón de Rosalía en Santiago, en San Domingos de Bonaval

Noia, 3 de maio de 2012. Este venres, día 4 de maio, ás 20:30 horas na Casa da Cultura de Noia, Ana Blanco, vicepresidenta da Fundación Rosalía de Castro, impartirá unha charla- coloquio baixo o título "Nace a escritora" en homenaxe a Rosalía de Castro no 175 aniversario do seu nacemento.

A charla está organizado pola Concellería de Cultura do Concello de Noia.

Pode que tamén lle interese:


Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical